االسلام عليكم ورحمة الله وبركاته
اليوم بغيتكم تشاركوني مقرونية غير شكل وحتى مداقها روعة جربوها صدقوني
نبداو على بركة الله
شحرت بصيلة مع زويتة ديال العود وملح وبزار
وفي نفس الوقت دهنت 220 كرام من المقرونية بشوية ديال الزيت وعملتها تصلق مع شوية ديال الملح
منين تصلقات عملتها تصفى من الماء
دابا نوجد لاصوص بيشاميل
عملت 40 كرام زبدة تدوب
ضفت ليها 40 كرام طحين فورص حركت مزيان وبسرعة باش ميتكورش لينا الطحين
ضفت ليها 2 كيسان ونصف ديال الحليب وبقيت نحرك على نار مهيلة حتى بدا لاصوص يتقال ويتخثر
زولتو من النار وضفت ليه ملح بزار شوية كوزة محكوكة
تم حكيت فيه شوية من الفرماج الاحمر وشوية من فرماج الموزاريلا تم حركت
وضفت للكل 200 كرام قشدة انا استعملت هولالا اما العلبة لي في الصورة راها ديال القشدة الطرية ولكن محتافظة بيها فارغة باش كنعبر بيها دايمن هولالا وحركت الكل
خديت كاميلة عملت فيها المقرونية مع البصلة المشحرة
ضفت ليهم لاصوص البيشاميل والقشدة والفرماج حركت الكل
وخويت الخليط في مول كيدخل الفرن
وحكيت عليه الفرماج الاحمر وفروماج المزاريلا ورشيت شوية الزعتر ودخلتها الفرن
وهاهي واجدة ميمتي مداق رائع ولا يقاوم
