السلام عليكم ورحمة الله وبركاته
كيفكم أخواتي في الله وعيد سعيد على كل نساء الأمة الاسلامية عامة وعلى النساء المغربيات الحادكات خاصة
بما أن اليوم عيد المرأة وفي نفس الوقت عيد ميلاد بنتي الغالية الله يحفظ ليكم وليداتكم قلت نعمل طورطة ونضر عصفورين بحجر هههة عيد المرأة ونرضي بنتي واخا كيف قلت ليكم راه منعتابروش عيد ميلادولكن احتفال أسري والله يجعل أيامنا كلها فرح وخير وياربي ثبتنا على دينا اللهم أمين
سامحوني طولت عليكم نبداو بادن الله
طورطة بلاموس ديال الفريز
المقادير كيف ما هي على الصور
100 كرام طحين
100 كرام سنيدة
3 حبات بيض عملتها في الماء طايب
خمارة وساشي فاني
شعلت الفرن يسخن
الطريقة
ضربت البيض مع سنيدة وفاني لمدة 10 دقايق حتى اصبح مرغوي ومفشفش
من بعد ضفت ليه الطحين معالخمارة على 3 دفعات وحركت بالمعلقة الخشبية من تحت الى فوق
خديت لاطا عملت فيها ورق الطبخ وعملت فوق منو قرص دائري دهنت ليه الجوانب ديالو بالزبدةورشيتهم بالطحين وكبيت الخليط وعملتها في الفرن تقريبا 45 دقيقة
هاهي طابت
قسمتها على جوج من الوسط خديت غير واحدة بحيت استعملت طبقةواحدة والاخرى خزنتها حتى نعمل بيها شي طورطة أخرى بادن الله
هاهي سقيتها بعصيرسي بون ديال الليمون مالقيتش ديال الفريز
دابا غنوجد لاموس
عملت 4 وريقات الجيلاتين يترطبوا في الماء العادي
خديت 250 كرام ديال الفريز مغسول ومقطع مع 100 كرام سنيدة طحنتهم مع بعضياتهم
وعملتهم في كاسرونة وعملتهم على نار هادية
غير بدا الخليط يغلي طفيت النار وعملت فيه الجيلاتين معصورين من الماء وحركت الخليط
خليتو حتى برد عاد ضفت ليه 250 كرام قشدة مضربة حتى ولات شانتيي انا كيف العادة كنستعمل قشدة هولالا بديت نحرك بالخشبة
حتى حصلت على لاموس بالفريز
عملت قرص الجينواز المسقية في وسط قرص حديدي وكبيت عليها لاموس دخلتها للكونجيلاتور تشد راسها
منين خرجتها زولت ليها القرص وطليتها كاملة بالكريم الشانتيي ولصقت ليها في الجوانب أشكال من الشكلاط
الان نقول ليكم كيف حصلت على أشكال الشكلاط
خديت ورق الطبخ وقيستوا على دائرة القرص بحيت حصلت على شكل سمطة طويلة من ورق الطبخ هاد السمطة هي لي زوقتها بشكل عشوائي بالشكلاط مدوب في حمام مريم ومنين نشف زولتوا ولصقتوا على محيط الطورطة
والان وجدت كلاصاج بالفريز غطيت بيه وجه الطورطة كالاتي عملت 100 كرام فريز طحنتها مع 2 معالق كبار سنيدة وعملتهم فوق النار حتى سخنوا وضفت ليهم 2 وريقات جيلاتين مرطبين في الماء ومعصورين وخليتو غير برد شوية وكبيتو على وجه الطورطة واخا سال شوية من الجناب في الاخير غنقادوا الطورطة ونفينيوها مزيان ودخلتها للتلاجة باش الكلاصاج يشد راسوا
كان ممكن نخليها على هاد الشكل ونزينها بالكريم شانتيي ولكن بنتي ترجاتني نعمل ليها صورة سبونج بوب منين خرجتها من التلاجة ودهنت الصورة بالناباج ولصقتها على وجه الطورطة وزوقت بالكريم شانتيي
وهاهي الطورطة واجدة مع عصير لافوكا بالصحة والراحة
هنايا شعلت ليها شمعة صدعاتني ماما نطفي الشميعة
هاهي كيف عاملة من الوسط
وهاهو طريف لاحلى اخوات في الله
لاتنسوني من دعواتكم
اللهم قنا عذابك يوم تبعث عبادك يارب