السفة بالماء البارد وبالصور المداق روعة

السلام عليكم
كيفكم حبيباتي  نتمنى الكل على خير
نبداو بسم الله السفة انا كنعرف الكل كيعرف للسفة ولكن هادي طريقة سهلة كنهديها لكل وحدة كتعجن ليها السفة 
ندهنو السفة بالزيت

ونردوها تفور ربع ساعة

تم نقلبو الكسكاس في بانيو فيه الماء عادي من الروبيني تم نحلوها بايدينا وسط الماء

ومن بعد نديروها فشي شبكة تسقطر انا درتها في كسكاس اخر ماشي داك لي فارت فيه

منين تسقطر نديروها في القصرية و ندهنها بشوية زيت ونرجعها تفور ربع ساعة

تم نكرر نفس العملية

ومنين تسقطر

نديروها في القصرية باش كنحركوها شوية باليد

ونرجعها تفور بلا ماندهنها ولكن ندهنو غير القاع ديال الكسكاس ونخليها تفور تاني ربع ساعة
ونقلبها في البانيو كيف العادة

غير هاد المرة نهزوها من الماء وهي باقا شوية سخونة ونديروها تتسقطر

ونخويوها في القصرية

وكيف قلت تكون باقا شوية سخونة والسبب انها منين تكون في القصرية غنديرو ليها الملح والزبدة باش تدوب شي 3 معالق كبار لنصف كيلو شعرية ومعلقة كبيرة ماء زهر وسنيدة المقدار لي غيحليها هاد سنيدة تفور معاها من اختراعي ونخلط الكل بايدينا حتى تدوب الزبدة وتتحل الشعرية تم نعمل (الزبيب لي صلقناه من قبل في الماء الطايب وصفيناه) في قاع الكسكاس ونعمل فوقو الشعرية ونخليها تفور 10 تال 15 دقيقة

من بعد نحطها في القصرية

وندير ليها شوية زبدة والى خاصها الحلاوة نعمل ليها السكر كلاصي ونحركها باليد غير شوية

ونغطيها بمنديل نقي تبرد غير شوية عاد نحيدو المنديل وندير ليها شوية ديال اللوز مهرمش

ونقادوها في الطبسيل ونزوقوها بالقرفة والسكر كلاصي واللوز مهرمش واللوز صاين وبالصحة والراحة

ملاحظة منين تكون تفور غطيوها بشي منديل
ايوا شي دعيوة مع وليداتي ووالديا واخوتي وزوجي  الله يجازيكم كل خير
وشي دعوة لشيخي الله يرحمو ويوسع عليه ضائقة القبور