السلام عليكم
مشيت لمرجان ولادي خديت ليهم الكلاص 2 كورات في حك صغير ب 10 دراهم يعني ولادي بجوج 20 درهم
المهم جيت لدار وانا نجربو وصدق بحالو تماما منين عطيتو لولدي قال ليا ماما واش جبتيه من مرجان وكنتي مخبياه في الفريكو ههههههههههة
طولت عليكم سامحوني
ندخل معاكم مباشرة
اولا نضرب 4 بياض البيض بالضراب الكهربائي حتى تشوفوه طلع عاد تزيدو عليه 50 كرام سنيدة دون التوقف عن الضرب ولما يصبح متل التلج اي تقلبو الطاوة لي خلطتوه فيها وتلقاوه مكيطيحش من بعد توضعوه في التلاجة
تانيا تاخدو كريم فريش هناك نوعين اما حك ديال 200 مللتر غادي ضربوه بالضراب الكهربائي حتى يطلع وتاهو تضيفو ليه 50 كرام سنيدة دون التوقف عن الضرب حتى يصبح شانيي من بعد تديروه في التلاجة
او تعملو بحالي انا مكانش عندي حك كريم فريش اي القشدة الطرية ولكن كان عندي كريم هولالا كيكون ف كارطونة عبرت منو 200 مللتر وضربتو مع معلقة كبيرة سنيدة حيت هو اصلا حلو ماشي بحال القشدة لي كتكون في الحك مسوسة المهم راه بحال بحال في النتيجة عملو الموجود عندكم
تالتا نديرو ربع ليتر حليب يفيض فوق النار وفي هده الاتناء نضرب اصفر 4 بيضات مع 50 كرام سنيدة بالضراب الكهربائي حتى يبيض لونه ويصبح كتيف عاد نضيف له 4 معالق كبار بودرة الشكلاط اما كاوبيل او اي نوع من البودرة تحبونه ونضرب بالضراب من بعد نضيف له الحليب وهو غليان ونضرب بالضراب غير شوية حتى ينسجم الخليط ونضعه على النار مهيلة ولا نتركه يغلى غير يتكتف شوية نزيله وهده العملية تبغي التحراك بالمعلقة الخشبية دون توقف من بعد ما نزيله عن النار نبقى نحركه حتى يبرد تماما والى كنا مزروبين ندخله للتلاجة كي يبرد ومرة مرة نحركوه داخل التلاجة
رابعا نرجعو لابيض البيض والكريم فريش نخلطهما بالمعلقة الخشبية من تحت لفوق باش ميطفس لينا الخليط ولما ينسجم الخليط نخرجو اصفر البيض من التلاجة بعد ما برد تماما ونضيفة للخليط ديال ابيض البيض والكريم فريش ونخلط بالخشبة دائما من تحت لفوق حتى ينسجم ونحصل على خليط شكله شكل لاموس ندخله للفريكو وبعد ساعتين نخرجه ونضربه بالضراب الكهربائي تم يرجع للفريكو تم بعد ساعتين نعاودو نضربوه ويرجع للفريكو تم بعد ساعتين نضربه للمرة الاخيرة تم نوضعوه في بواطة ونضعه في الفريكو لحين الاستعمال وبالصحة والراحة

سامحوني على التطوال غير باش يوصل شرحي سواء للعبقريات او المبتدئات بحالي واي استفسار انا رهن الاشارة
بالنسبة ليا مكنبغيش نشري الحك هاهو

حيت فيه مدة صلاحية صغيرة بزاف وانا موجودة في مدينة صغيرة مافيهاش الكريم فريش داكشي علاش منين كنمشي لمرجان ديال شي مدينة اخرى كنشري كريم هولالا هاهو

مدة الصلاحية فيه سنة كنلقاه موجود في داري وقت ما بغيت نجرب شي وصفة كنلقاه
شي دعيوة من عندكم  لهلا يخطيكم عليا يا حبيباتي