السلام عليكم
كيفكم الحادكات ديالنا وكيف الاحوال نتمنى الكل بالف خير
جيتكم كيف العادة تشاركوني سويسرول بالشكلاط نبداو على بركة الله
مقادير الجينواز
5بيضات 100 كرام سنيدة صاشي لفاني 120 كرام طحين مغربل راس السكين ديال خميرة الحلوى
الطريقة
اولا نشعلوا الفرن يسخن
تانيا ضربت البيض مع سنيدة والفاني
لمدة 10 دقايق حتى اصبح مرغوي واللون ديالو ابيض
عاد ضفت الطحين مع الشوية ديال الخميرة مغربلين ولكن ضفت الطحين على 3 دفعات ونحرك بالمعلقة الخشبية بشكل دائري
باش نحافظوا على قوام الكيك ميهبطش ويبقى مفشفش بحال هاكدا
عملت ورق الطبخ في المول ودخلتها للفرن 15 دقيقة
الان نوجد الكاناش باش غنلبسوا ليها من الخارج
ناخد كاسرونة نعمل فيها 200 كرام شكلاط و150 كرام كريمة هولالا او اي كريم كتحبوها سائلة و40 كرام زبدة الكل على نار مهيلة بمجرد تدوب الزبدة والشكلاط نطفي النار منخليوش الشكلاط يغلى باش ميتحرقش سامحوني مصوتش هاد المرحلة نسيت مع التلفة ههههة
الان هاهي طابت خرجتها خليتها شوية
وقلبتها على فوطة مبللة غير شوية وزولت ليها ورق الطبخ
تم سقيتها بعصير طانك كان عندي اما نتوما سقيوها بلي بغيتو
تم طليت عليها كريم شانتيي انا كيف العادة كنستعمل قشدةهولالا ضربت منها شوية لي غيقدني
ورشيت عليها الفيوتين شريتو هاكداك وانتوما رشوا عليها لي بغيتو اما مكسرات مهرمشة ولا طونيك محكوك لي بغيتو
تم لويتها بالفوطة وخليتها واحد تلت ساعة باش تاخد الفورمة
من بعد زولت عليها الفوطة وقطعت ليها الجوانب بطريقة مائلة تم طليتها بالكناناش وشرطتها بالفورشيط باش نعطيها شكل الشجرة وحطيت فوق منها هادوك الجوانب لي قطعت طرف طليتو بالكريم فريش وطرف طليتو بالكاناش وتاهما شرطهم بالفورشيط ورشيت عليها سكر كلاصي باش نعطيها شكل الثلج والجو البارد هههههة وبعض الشكلاط محكوك
وهاهي سويسرول واجدة لها شكل وطعم روعة
بالصحة والراحة حبيباتي
اللهم احفظنا يارب وادمها علينا نعمة واحفظها من الزوال
نخليكم في امان الله ولا تنسوني من دعواتكم جزاكم الله خير