السلام عليكم اخواتي في الله وكل من يحبني ويشرفني بالمرور على وصفاتي سواء على المدونة او الفايس بووك
جيتكم بوصفةالدجاج في الصاشي وهي فكرة حبيبتي التازية لها موقع على الفايس بووك باسم مطبخ التازية
نبداو بسم الله
كنوجد ليه الترقيدة و الي هي معلقة موطارد و فلفلة حمرة و كامون و ابزار و زعتر و زعفران و صوجاو كنور بكري كيبقى اختياري و كنزيدو عصير نصف حامضة و نخلطو كلشي و نشرملو الدجاج حتى ساعة او اكثر
دابا ندوزوللتعميرة
عمرتها ب القسبور و المعدنوس و المعدنوس يكون اكثر و كنقطعوه مزيان و كندقوه مع الثومة و كنضيف العطرية فلفلة حمرة و كامون و ابزار و شوية سكين جبير و زعفران والحامض مصير مقطع و شوية زيت بلدية و نخلط الكل وعمر بيه الدجاجة
هاهي في الصاشي عقدتها وعملت ليها فتحة منين يخرج البخار وعملتها في الفرن لمدة ساعة
منين طابت هاديك المريقة لي خرجات من الدجاجة عملتها في مقلة وضفت ليها معلقة صغيرة مايزنا وعملتها تعقاد
رافقت هاد الدجاجة ببلاطو ديال السلطة مكونة من
عملت في الكوكوت الروز مع القياس ديال الماء وعملت الكسكاس ديال الكوكوت فيه خيزو وبطاطا والشفلور والكرمب والكورجيط مقطعين كلشي هادشي بخرتو في كسكاس ديال الكوكوت
من بعد شديت الكورجيط سوطيتها في شوية زيت العود والزبدة والملح والبزار
نفس لي عملت للكورجيط عملتو للكرمب
وفي طبق التقديم
عملت البطاطامع الروز والدرة والطون والمايونيز
تم خيزو مع الروز والدرة والطون والمايونيز
تم الشفلور مع الدرة والطون والمايونيز
الكورجيط بوحدها
الكرمب مع الطون والمايونيز
وحطيت الدجاجة في الوسط
ورافقتها بلاصوص ديالها
هادي المائدة واجدة مع العصير ديال الحامض وزليفات ديال خيزو محكوك مع عصير الليمون وماء الزهر وسنيدة حسب الدوق
اللهم ادمها علينا نعمة واحفظها من الزوال ولا تنسوني من الدعاء لي ولدريتي بالستر والامان يارب