كيفكم اخواتي في الله نتمنى الكل بالف خير
البارح حطيت طورطة ولدي كانت اول الشهر
اليوم غنحط طورطة زوجي
هاد الطورطة كانت في اول شهر دجنبر شفتو واخا طورطة راجلي صاوبتها هي الاولى منين بغيت نحطها في مدونتي سبقت ديال ولدي ايوا هادي هي الامومة والكبدة الله يسمح لينا من الوالدين والله يخلي ليكم وليداتكم ووالديكم طولت عليكم نبداو بسم الله
اولا نبدا بالكريم موسلين عبارة عن
كريم باتسيير حضرتها ب 2معالق كبار عامرين بودرة الكريم باتسيير مع نصف ليتر حليب مع 4معالق كبار سنيدة نخلط الكل ونضعه فوق نار هادئة مع التحريك المستمر حتى يعقاد لينا تم نزيله من النار ونلوح فيه طريف صغير زبدة باش متكونش لينا القشرة على الوجه ونخليوه يبرد
منين يبرد نضيف ليه 75 كرام زبدة لينة ونخلط بالضراب وهاكدا نكونو حصلنا على كريمة موسلين
تانيا كيف العادة الجينواز المعتادة
3 بيضات
كاس سكر
نص كاس زيت
حامضة محكوكة بعصيرها
كاس و نص طحين
خمارة
الطريقة
كناخدو المقادير كلها من غير الطحين و خمارة وكنطربوهم مزيان بالطراب
حتى يولي الخليط ابيض و مرغوي
ثم نضيف الطحين +خمارة و نحركو بمعلقة خشبية حتى يتجانس الخليط
تم نفرغوه في مول دائري والى الفرن
ومنين طابت قسمتها من الوسط بحيت حصلت على قرصين
حطيت القرص الاول في وسط الاطار ديال المول لي طابت فيه ماشي المول كامل اكرر غير الاطار ديالو
سقيت الجينواز بالقهوة مدابة
شريت علبة ديال الاناناص وقسمت الدوائر من النصف بحيت حصلنا على نصف دوائر
رتبت هاد الاناناص في الحاشية كاملة ديال الاطار كيف ما هو واضح في الصورة
وخويت فوق من الجينواز الكريم موسلين بحيت يكون الكريم حتى في الفراغات بين الاناناص سمحولي تمحات ليا هاد المرحلة من المصورة معرفتش كيفاش المهم راني كنحاول نشرح ليكم باش الفكرة توصلكم هاهي الكريمة موسلين
وكمرحلة اختيارية فوق الكريم موسلين تلوحواناناص مقطع طريفات صغارتم نضع القرص التاني من الجينواز ونضغط بايدينا غير بشوية بحال الى غنكرصو الخبز
تم نسقيوها بالقهوة المدابة
تم نضع طبقة من الكريم شانتيي ونحاولو نقادوا ليها الوجه ونضعها في الكونجيلاطور
منين خرجتها زولت ليها الاطار حاولت نملس ليها الوجه مرة اخرى بالكريم شانتيي
تم زوقتها بوريدات من الكريم شانتي وحبات الفواكه الجافة الحمراء ودوبت الشكلاط وكتبت بيه وعملت بعض الخطوط عشوائية
وهاهي الطورطة واجدة قدمتها مع عصير الحامض بالكريم شانتيي بالصحة والراحة نتمنى تكون عجباتكم
الله يسر امورنا واسترنا فوق الارض وتحت الارض ويوم العرض عليك
اللهم انك عفو تحب العفو فاعفو عنا
اللهم انك عفو تحب العفو فاعفو عنا