طورطة بلاموس كراميل

 
السلام عليكم اخواتي كيفكم وكيف الاحوال وكيف عاملين مع البرد الله يرحمنا برحمتو يارب
هادي طورطة ديالي واخا عيد ميلادي تال الاتنين الجاية اي انا سبقتها باسبوع باش نخرجومن المحضور ومنحسبوهش عيد ميلاد المهم فرحت وليداتي وكتبت عليها اسمي تا انا نفرح هههههة
نبداو بادن الله اليوم غنقدم ليكم طورطة واعرة وهي طورطة بموس كراميل احسن من الباتسريات وللامانة الموس بالكراميل فكرة حبيبتي التازية معروفة بمطبخ التازية في الفايس  هي لي قالت ليا كيف نحضرها وانا طبقت التعليمات جزاها الله خير الله يحفظها ويحفظ ليها وليداتها يارب
نبداو بالجينواز وهي الجينواز لي كنستعمل وكنرتاح فيها
كنضرب 4 بيضات مع 80 كرام سنيدة وساشي فاني حتى يصبح الخليط مرغوي وابيض انا ضربتو 10 دقايق


من بعد المفروض نضيف 125 كرام طحين ولكن انا ضفت 120 كرام حيت ضفت ساشي ديال الزا شكلاط فيها 7 كرام ادن مابين الطحين والشكلاط غيولي عندي 127كرام ادن بحال 125 كرام لي قلت ليكم في الاول وطبعا خمارة ديال الحلوى ونبقا نخلط بشكل حلزوني بالمعلقة الخشبية


هاهو الخليط كيف ولا مفشفش ههههة


درتها في المول والى الفرن طابت 40 دقيقة على 180 درجة طبعا الفرن يكون مسخن من قبل

هاهي خرجتها ومنين بردت قطعتها من الوسط وخليتها تنرجع ليها

 
دابا ندوزو لتحضير الموس بالكراميل

اولا
ضربت 350كرام ديال قشدةهولالا حتى ولات كريم شانتيي عملتها في التلاجة على جنب ورطبت 3 وريقات الجيلاتين في الماء عادي من الروبيني




تانيا
نحضرمرحلتين في نفس الوقت
كنضرب 4 اصفر بيض مع معلقة كبيرة سنيدة

وفي نفس الوقت لي انا كنضرب فيه دايرة 150 كرام سنيدة على النار كتدوب حتى تولي كراميل


منين اصبح خليط اصفر البيض ابيض اللون وتاهو مفشفش رجعت للبوطة نشوف سنيدة هاهي ولات كراميل

وفي نفس الوقت درت 300 كرام قشدة هولالا تسخن غير شوية ماشي تولي تحرق

وضفتها على سنيدة منين ولات كراميل ردو بالكم اخواتي باش متحرقوش ولازم متكونو عندكم السرعة حيت كنخوي هولالا على الكراميل وانا كنحرك بالخشبة بسرعة


متخافوش واخا غيولي حجرة غير استمروا في التحريك على نار مهيلة بسرعة حتى تحصلوا على خليط سائل بحال هاكدا

دابا نشدو الخليط وهو سخون نخويوه على خليط اصفر البيض مع التطراب انا راني درتو في العجانة انا كنخويو الخليط شوية بشوية والعجانة كتطرب الخليط حتى نكمل ويصبح الخليط بارد حيت راه طبيعي مع السخونية ديال الكراميل كيكون سخون

ايوا دابا نرجع لوريقات الجيلاتين نعملتهم في كاسرونة ودوبتهم مع 2 معالق كبار من سائل القهوة

ومنين يدوبو نبقا نحرك الكاسرونة غير يدفاو شوية ونضيفهم على الخليط ونضرب بالضراب شوية من اجل الانسجام فقط

اخر مرحلة نخرجو الكريم شانتيي لي احتافظت بيه في التلاجة ونبدا نضيفو للخليط على 3 مراحل مع التحريك بشكل حلزوني بالمعلقة الخشبية


هاهي لاموس كراميل وجدات

دابا نبداو نحضروا في الطورطة

عملت ديك الكارطونة ديال الحلوى عملت فيها قرص ديال الجينوازسقيتها بالقهوة السائلة


عملت نصف لاموس كراميل


تم الجينوازالتانية مسقية بالطبع


وغطيتها كلها بالموس وبقيت نقاد على قدر المستطاع

انا معنديش السباتيل كنقاد غير بواحد السكين عندو سنينات ودخلتها الفريكو نعسات هههة اليوم في الصباح خرجتها وبديت كنزين فيها كل وحدة وطريقة التزيين تبارك الله عليكم راكم روعة في التزيين انامعنديش فن التزيين وعاد عدبني الشكلاط مزوينش كندوبو وهو كيرجع يتكلل ويتجمع مساعدنيش في التزيين وخرجت نقلب على داك الشكلاط لي عبارة عن صدف اي دوائر ملقيتوش وملقيتش اللوز ايفيلي هادا هو حال المدن الصغرى
سامحولي طولت عليكم في الهدرة
المهم زينتها بالشكلاط قليبات ودوك الحليوات الملونة وشوية كريم شانتيي وشكلاط بودرة
ميمتي عييت بالكتابة ههههة لكن معليش الطورطة تستاهل ومن اجلكم حبيباتي حتى نتوما تستاهلو
 

اللهم ادمها علينا نعمة واحفظها من الزوال يارب

هاهي النهاية 

قدمتها مع العصير

  وهاد الطريف لحبيبتي التازية وكل من يحبني