طرطة بنكهة القهوة والشكولاطة

السلام عليكم كيفكم اخواتي وحبوباتي
اليوم 8 مارس اليوم العالمي للمراة ولكن راه هو تاريخ ميلاد بنتي ايوا مسكينة مرضات ليا عاوتاني نهار الاربعاء والخميس واليوم مع هاد الجو ايوا مع مسكينة كتموت على تطفي الشمع قلت نفرحها بشي طورطة وتطفي الشميعة ديالها سامحوني طولت عليكم
المهم الطورطة من عند حبيبتي ناني 73مع بعض التغييرات
نبداو المقادير
4بيضات
200كرام سنيدة
ربع ليتر زيت
كاس عنبة حليب
3 معالق كبار فهوة سريعة الدوبان
2 ساشي فاني
شوية ملح
300 كرام طحين فورص
الطريقة
يخفق البيض مع الفاني والملح واحد نصف دقيقة تم نضيف سنيدة ونبقاو نخفقوا بالضراب الكهربائي حتى يتضاعف حجمه ويبهات لونه عاد نضيف الزيت ونكمل التطراب ونضيف القهوة من بعد نضيف الطحين مغربل مع الخمارات ولكن نضيف الطحين بالتناوب مع الحليب حتى تنسجم العناصر نفرغ الخليط في 3 قوالب متساوية الحجم ومنين يطيبوا نتركهم حتى يبردوا عاد نزولوهم من القوالب
الان نبداو في تحضير السيرو باش غنسقيوا الطوطة ديالنا مكون من كاس عنبة ماء مغلى و3 معالق كبار سنيدة ومعلقة كبيرة قهوة سريعة الدوبان
الان تحضير كريمة الحشو
2 علب قشدة طرية ما يعادل 500 ملل
معلقة كبيرة من صلصة الشكولاطة
معلقة كبيرة قهوة سريعة الدوبان
2 معالق كبار حليب
ندوبوا القهوة في الحليب ونضيف ليها صلصة الشكولاطة ونضيف الكل الى القشدة الطرية ونطرب الكل بالضراب الكهربائي حتى نحصلوا على كريمة شانتيي
الان نبداو في تحضير الطورطة
نضع القرص الاول من الجينواز تم نبلله بالسيرو ونغطيه بطبقة كثيفة من الكريمة

تم القرص التاني ونيلله تم

طبقة كثيفة من الكريمة ونوزع الجوز مجروش انا مكانش عندي عوضتو بالفواكه المعسلة

واخيرا القرص الاخير نبلله كدلك

تم نغطي الطورطة كاملة بالكريمة ونحتفظ بالقليل من الكريمة للتزيين

نغطي جوانب الطورطة برقائق اللوز المحمرة
يزين محيط الطورطة بوردات من الكريمة الشانتيي ونغطي الوسط بالشكولا فرمسيل
تم يغطى الشكولا فرمسيل بصلصة الشكولاطة