السلام عليكم كيفكم حبيباتي ع نبداو بسم الله
ناخدو الطاجين نعملوا فية زويتة بلدية تم نفرشو البصلة مشنفة
من بعد نزلو اللفت المحفور
من بعد اللحيمات على حسب الافراد
ايوا في الاخير نديرو لالة مولاتي البطاطا قصبية
ومرة اخرى نشلظو فوق منها بصيلة
والى بغيتو تديرو الزيتون انا راه غير نسيتو خاصة الى كان ديال الدار كيجي لديد
في الاخير نديرو العطرية في واحد زليفة صغيرة ملح بزار خرقوم سكنجبير شوية كامون تحميرة
ونخلطو كلشي بالماء
ونسقيو بيه الطاجين
ونرشو شوية ديال الربيع
ونردوه يطيب على نار مجهدة غير يبدا يغلى ننقصوا النار حتى الحد ديالها ونخليوه يطيب على خاطرو تقريبا ساعة ونصف بالصحة والراحة
سامحوني مصورتوش منين طاب حيت غير طفيت عليه ومشيت كنجري للعمل ومنين رجعت شعلت عليه يسخن بدون منصوروا عاوتاني حيت مع التلفة والزربة ديال الدراري خصهم يتغداو ويرجعوا للمدرسة وانا نرجع للخدمة راه الشطنة والعقل والو الله يكون في عون جميع الموظفات
تهلاو ولا تحرموني من دعواتكم الله يجازيكم الف خير خاصة دعيوا معايا تتحل مشكلتي في العمل ويتحقق مرادي وشكرا