السلام عليكم
كيفكم يا نساء يا حادكات ومكافحات سنة سعيدة عليكم بمناسبة اليوم العالمي للمراة
نبدا بسم الله نعطيكم كيف عملت لازان بطريقتي وكانت قالت ليا عليها لوستي انها كتجي لديدة قلت نجربها ولكن ضفت عليها بعض المقادير كاضافة
اول حاجة عملت كفتة ديال البيبي شلظت فيها بصلة صغيرة وشوية كوزة محكوكة والعطرية المعروفة خليتها شي 3 ساعات مرقدة
شديت المقلة عملت فيها البصلة تتشحر مع 2 دريسات توم و3 معالق كبار زيت العود من بعد ما تشحرات ودبالت ضفت عليها 2 مطيشة محكوكة وخليت الكل يتشحر من بعد ضفت الكفتة المتبلة وخليت الكل يتشحر شوية
وعاودت ضفت 3 خيزو محكوك و3 كورجيط صغار محكوكين والعطرية ملح بزار خرقوم تحميرة شوية المروزية وسكنجبير وشوية كوزة محكوكة
ومعلقة كبيرة مطيشة ديال الحك ومعلقة كبيرة صوص صوجا وغطيت الكل وخليت الخليط يطيب على خاطرو على نار مهيلة بدون منضيف حتى قطرة ماء راه غيطيب في الماء ديال الخضرة ومن بعد ينشف من الماء ككل
الان هاهي صورة لازانيا لي استعملت
هاهي عملتها تصلق في الماء فيه ملح وزبدة او زيت انا صلقت كل 3 ورقات بوحدهم لمدة 10 دقايق ونزلهم في منديل ونعمل 3 جداد وهكدا
في هاد الاتناء لي كنصلق فيها لازان كنحضر لصوص بيشاميل الكل كيعرفها ولكن ندكر الاخوات المبتدئات بيها
نعملوا في كاسرونة 2 معالق كبار زبدة انا ضفت ليهم معلقة كبيرة زيت العود وعملتها تدوب من بعد ضفت ليها 3 معالق كبار فورص وحركت بسرعة باش ميتكورش الطحين وضفت نصف ليتر حليب وشوية ملح بزار وشوية كوزة محكوكة وعملت الكل على النار مهيلة ونبقاو نحركوا حتى يعقاد الخليط ونخليوه جانبا
خديت المول لي غيدخل للفرن دهنتوا بالزبدة ونزلت فيه طبقة من اوراق لازان
تم طبقة ديال الحشوة ديال الكفتة
تم طبقة لصوص بيشاميل
تم مربعات الفرماج الخاص بالسندويتشات و2 معالق كبار قشدة طرية
تم طبقة لازان تم الحشوة تم صوص بيشاميل و2 معالق قشدة طرية واخيرا عملت طبقة اخيرة من لازان
وطبقة من صوص بيشاميل و2 معالق كبار قشدة طرية
وعاد الحشوة هاد المرة خالفت الترتيب
ونغطيوا الوجه بالفرماج الاحمر محكوك انا مكانش عندي عملت مربعات الفرماج
ولكن متعملوهمش حتى تطيب لازان انا عملتهم في الاول كانوا غيتحرقو ليا خاص الفرماج يبقى اخر مرحلى حتى تطيب لازان ومنين نبغيوا نقدموها عاد نرشوها بالفرماج ندخلوها للفرن تسخن ومنها يدوب الفرماج
هاهي كيف طابت
هادا طريف لاول وحدة تشجعني
متقلقوش هاني قطعتها باش متقلق تا وحدة من حبوباتي
لا تنسوني من الدعاء جزاكم الله خيرا خاصة بالصلاح الستر لاولادي