السلام عليكم
الكل كيعرف السفة بالدجاج انا زدت التفاية خديت الفكرة ديال التفاية من حبيبتي فضيلة البوصيري دات الاطباق الرائعة والهائلة الله يعطيها الصحة وينولها لي في بالها يارب دعيو معاها ومع وليداتي
نبداو بادن الله
 نرطبو شوية ديال الزبيب في الماء
نصلقو شوية لوز ونفسخوه ونقليوه نهرمشوه ولكن نخليو منو شي حبات صاينين للزواق
كنديرو الدجاج في الكوكوت وعليه الزيت( شوية رومية وشوية بلدية) بصلة مشلظة ملح بزار خرقوم سكينجبير شوية سمن درس توم محكوك الربيع ليبغيتوه مربط او مفروم نترك الكل يتشحر شوية من بعد نروي غير القياس لي يطيب الدجاج وباش تكون المريقة خاترة وواقفة من بعد نسدو على الدجاج يطيب
منين يطيب الدجاج نزولوه من الكوكوت ونخليوه يتسقطر تم نفرتتوه بحال الى باغيين نديرو بسطيلة
ناخدو بصلة نقطعوها على شكل هلالات ونديروها في كاسرونة ونضيفو ليها الزبيب بعد ما صفيناه من الماء +ملعقة من السمن+شويت الملح+سكين الجبير+لبزار+عود الديال القرفة كنخظو المرق من الكوكوت ونضيفوها لتفايا ديالنا كنخليو البصل حتايطيب عاد نضيفو ليه السكر ونتركه يتعسل ومنين نقربو نطفيو عليه نرميو راس الموس من الزبدة
ملاحظة
المكتوب بالاحمر هو لي نقلتو عن حبيبتي فضيلة البوصيري
دابا ها التفاية واجدة والدجاج مفرتت

نمرو للسفة الشعرية ندهنها بالزيت ونردوها تفور مزيان

من بعد ما فارت تقريبا شي نصف ساعة نخويو الكسكاس في القصرية ونسكب عليها الماء الطايب نحركها مزيان

ومنين تتشرب شوية الما الطايب وتكون دفات شوية نحيدو ليها الفائض من الماء ودلك بتصفيتها فشي شبكة متلا او في الكسكاس نفسه
تم نرجعها تفور الفورة التانية

ونفس العملية منين تفور نضعها في القصرية ونسكب عليها الماء الطايب غير القياس باش تا الشعرية تشربو

والى بقا شي فائض نصفيوها وتكون دافية منخليوهاش تتبرد ونعمل لها شوية ملح وشي 2 معالق كبار عامرين زبدة والجديد كدلك في هاد السفة اننا كنرشو عليها واحد معلقة كبيرة زهر وسنيدة القياس لي غيحليها تم نحلوها بايدينا

تم نرجعوها تفور مزيان للمرة التالتة والاخيرة نتمنى نكون شرحت مزيان وشرحي يفهموه حتى المبتدئات
منين نبغيو نقدموها كنقلبو الشعرية في القصرية ونعاودونديرو ليها شوية زبدة في وسط الشعرية باش تدوب مع السخونية ونغطيوها بشي منديل حياتي شي 5 دقائق تم نحلوها بايدينا بديك الزبدة لي كنا درنا فيها من بعد
ناخدو طبسيل الطاوس نضع فيه فرشة ديال السفة تم الدجاج المفرتت والتفاية مخلطين ونرشو باللوز المهرمش

ونغطي الكل بالشعرية ونزوقها بالسكر والقرفة واللوز المهرمش وكدلك اللوز الصحيح وبالصحة والراحة



سمحولي غاتشوفوني كنبدل الكسكاس حيت مرة رديت الشعرية تفور على الدجاج ولكن في نظري الشعرية تفور بوحدها في البرمة افضل وكدلك باش ميترونش الدجاج لي بغات متلا تعمل دجاجة كاملة وتخليها صاينة تعملها مدفونة