السلام عليكم
كيفكم احلى اخوات في الله واحلى حادكات
يوم 2 يناير كان عيد ميلاد ولدي وانا لا احب اعياد ميلاد بحكم انها حرام وحتى ولدي مسكين قال ليا ماما عملي لينا حلوة ديال لاكريم وباش متحسبش علينا عيد ميلاد ناكلها تال الغد يعني 3 يناير هههههة وانا نوض واخا كنت مريضة مع السهير مع بنتي مسكينة كانت مريضة 8 ايام وانا معاها في السهير الله يقدرنا و البرد مخلى تا واحد بلا ماداز عليه الحمد لله والشكر لله الله يرحمنا برحمتو يارب المهم شمرت على دراعي وقلت نعمل طورطة نفرح بيها وليداتي وانا نقول لبوالركابي سير جيب ليا المقادير وبديت الخدمة المهم سامحوني طولت عليكم في الهدرة
المقادير ديال الجينواز
3 بيضات 100 كرام سنيدة 100كرام طحين و40 كرام شكلاط بودرة خمارة حمراء
خلطت البيض مع سنيدة 10 دقايق بالضراب الكهربائي حتى اصبح مرغوي ضفت طحين والبودرة ديال الشكلاط والخمارة مغربلين وخلطت غير بمعلقة خشب من تحت الى الفوق بالمهل هاهو الخليط
دهنت المول بالزبدة رشيتو بالطحين خويت فيه الخليط
ودابا هاهي في الفرن كتطيب
هنايا طابت بردات قسمتها بالخيط من الوسط على 2
رطبت 3 اوراق الجيلاتين في زلافة بيها الماء
عملت كريم الباتسيير انا كنشري العلبة الكل كتعرفوها حبيباتي الحادكات لي مصورين فيها ملفاي المهم في كاسرونة عملت نصف ليتر حليب وضفت عليه 3 معالق كبارمن بودرة الكريم باتسيير مخلطة مع 4 معالق كبارسنيدة والكل على النار مع التحراك بسرعة باش ميتكورش الخليط ومن بعد نقصت النارمهيلة على الاخر وبقيت نحرك حتى عقاد
من بعد خديت كاسرونة صغيرة عملت فيها الاوراق ديال الجيلاتين بعدما عصرتهم من الماء و2 معالق كبار مشروب القهوة السوداء وعملت الكاسرونة على النار مع التحراك حتى دابت الاوراق وانا نضيفها على الكريم باتسيير وخلطت الكل
من بعد عملت 200 كرام من كريم فريش وضربتها بالضراب حتى اصبحت كريم شانتيي وانا كنضربها بلا سكر حيت كنستعمل قشدة هولالا كتكون حلوة كنعبر في الميزان عندي 200 كرام منها
من بعد خلطت الخليطين ب2 الكريم باتسيير والكريم فريش
هنايا عملت القطعة الاولى في وسط القرص وطبعا القرص في طبسيل وسقيتها بمشروب القهوة السوداء
وسكبت عليها الخليط ديال الكريمات ب2 لي سبق ليا خلطتهم
وعملت القرص التاني من الجينواز وهو مقلوب وضغطت شوية بيديا عليه بحال الى كنكرص الخبزوسقيت القرص بمشروب القهوة تم دخلت الطورطة للكونجلاطور لمدة 4 ساعات سامحوني مصورتش هاد المرحلة تبرزطت وملقيتش لي صور ليا كنت بوحدي ويديا عامرين
هنايا خرجتها من الكونجلاطور
هنايا دهنتها بكريم فريش كلها
من بعد سكبت عليها كلاصاج بالشكلاط وخليتو حتى جمد الكلاصاج وبديت نعمل ليها الشكلاط شعرية من الجناب ديالها كاملة
ودابا غنقول ليكم الكلاصاج كيف صايبتو حيت نسيت مصورتش المراحل
عملت معلقة كبيرة ناباج تدوب فوق النار وضفت ليها معلقة كبيرة بودرة الشكلاط و100 كرام شكلاط مربعات وحركت على نار مهيلة حتى داب الشكلاط (عاد نضيفو 2 وريقات جيلاتين مرطبين في الماء ومصفيين ونبقاو نحركو على نار مهيلة جدا حتى يدوبوا وريقات الجيلاتين وغير يدفا الكلاصاج شوية ) وخويتوعلى وجه الطورطة
تم زوقتها بلكريم فريش عملتو في البوش ودرت وريدات من الفوق
و كتبت عيد ميلاد بالسورانك جديدة طبعا شريتها خصيصا للكتابة عملت فيها شوية من كريم فريش مخلط مع جيرفي الاحمر ديال درهم وبديت نكتب وهنايا عملت وريدات اخرين بالبوش كبار على الاولين وكدلك من الجناب ديالها
هنايا عملت الشمعة ديال 14 سنة وصورتها مع كويسات عصير على قبل جات عندي واحد الاخت تطمئن عليا وعلى بنتي قلت ليها ولات لباس ومشات للمدرسة وانا نصاوب العصير وقلت ليها جيتي مع الطورطة ونصورها دابا حيت الى جات بنتي مغتخلينيش نصور
هنايا منين جاو ولادي من المدرسة شعلت الشميعات و حيت وصلات 6 ديال العشية صاحبتي بغات تمشي قطعت ليها طريف باش نسبقها تمشي وفعلا بنتي شافت اسم اخوها وجاتها الغيرة خليناها هي طفات الشمع وقلنا ليها سنة حيلوة يعني ماشي ديال اخوك ومزيان نيت باش ميتحسب علينا عيد ميلاد
نتمنى نكون شرحت مزيان طولت في الكتابة باش المبتدئات يفهموا اما الحادكات تبارك الله وماشاء الله عليهم راني كنتعلم منكم اخواتي
ودابا نقول ليكم على العصير
شديت شوية ديال الفريز طحنتو مع عصير طانك ديال الليمون غير شوية باش يبقى خاتر وسكبتو في الكيسان
من بعد عملت في مولينكس بنانة تفاحة فرماجة كاس دانون وعصير طانك وطحنت الكل طبعا مكاينش السكر حيت طانك حلو وسكبت فوق الفريز كيجي منظر غزال والوان زونة والمداق روعة
لا تنسوني من الدعاء لي بفك كربتي والدعاء لاولادي والستر والصحة يارب
اللهم ادخلنا الجنة بغير حساب ولا سابق عداب يارب