الأربعاء، 30 يناير، 2013

بسبوسة يا سلام جد لديدة

كيفكم حبيباتي 
نبداو بادن الله
ياسلام على المداق ديال هاد البسبوسة والله الى كتدوب في الفم وجاو شي صديقات عندي حمقاتهم وكدلك الوالدة ديالي عجباتها بزاف  وللامانة خديتها من واحد الاخت في احد المنتديات
المقادير
كتخلطي في مولنكس 3 بيضات وكاس وصف  زيت وكاس ونصف سنيدة وكاس ديال دانون فاني و1 ساشي فاني من بعد نخويو الخليط فشي طاوة ونضيف ليه 100كرام كوك و 250كرام سميدة رقيقة وخمارة حمراء نخلط الكل بمعلقة ونفرغ الخليط في مقلة ديال وجدة تكون مدهونة بالزبدة ومرشوشة بالسميدة ونرسلها للفرن

في هده الاتناء نحضر السيرو باش نسقيها
كيتكون من 2 كيسان سنيدة وكاس ونصف ماء يغلاو فوق نار مهيلة حتى يصفار ليه اللون ويتقال غير شوية ماشي بزاف ومنين نقرب نطفي عليه نفرغ عليه ربع كاس ماء زهر  او 2 ساشي فاني  لي متوفر عندكم نتمنى  نكون قدرت نشرح مزيان
ودابا سقيتها بالسيرو واهنا رشيتها بالكوك

اهنا طراسيتها بالسكين ماشي نقطعوها غير نطراسيوها فقط حتى تبرد مزيان عاد نقطعوها انا قطعت من الحاشية حيت بنتي تسمرت عليا كيف الجن هههههههة سكتها بداك شوية لي في الجناب حتى نحطها بعدة لواحد الصديقة جات عندي عاد نعطيها طريف مقاد

هاهي مقطعة وقدمتها مع عصير لافوكا وحلوة لاكريم غير شريتها من المخبزة ماشي صوبتها ههههة

هاهو طريف البسبوسة كيف كيجي يالاه لي غتدخل الاولى تخطفوا من يديا محدني باقا في الكوزينة قبل منديه لصديقتي لي كالسة كتسناني في البيت بالصحة والراحة

على فكرة لي بغات تزوقها باللوز انا مكانش عندي الوقت باش نصلقو ونفسخو ونقليه نتوما الى درتو كل لوزة او نصف لوزة في كل مربع تجي في منظرها اروع
اللهم ادمها علينا نعمة واحفظها من الزوال يارب


هناك تعليقان (2):

  1. تبارك الله وما شاء الله كل مواضيعك ممتازة
    ياركك الله أختنا الكريمة وحفظ الله لك سهيل وحفصة وزوجك,

    ردحذف
    الردود
    1. الله يبارك فيك اختي وجزاك خير على كلامك المشجع والطيب ولكن معرفتش علاش كل التعليقات والتشجيعات توصلي باسم غير معرف على العموم اشكر كل الاخوات في الله

      حذف